«Эдэрдии сайаҕас дууһаҕын кырдьарга үөрэтэ сатаама»  үһүс көлүөнэ саастаахтарыгар анаммыт үҥкүү күрэҕэ быйыл төрдүс төгүлүн ыытылынна.

Аһаҕас үҥкүү көрүүтүн бэрэссэдээтэлэ, наставник, Нам улууһун Ытык киһитэ, СР култууратын үтүөлээх үлэһитэ «Ретро-Данс» үҥкүү норуодунай коллективын салайааччыта Любовь Андросова, Нам улууһун З.П.Винокуров аатынан оҕо искусствотын оскуолатын үҥкүүгэ үрдүкү категориялаах преподавателэ, СР култууратын туйгуна Октябрина Попова, Нам улууһун Прокопий Ядрихинскай — Бэдьээлэ аатынан Олоҥхо дьиэтин  балетмейстера, «Үргэл», «Амаана», Ай-Ледис» үҥкүү коллективтарын салайааччыта  Римма Татаринова дьүүллүүр сүбэ сатсаабыгар олордулар.

Быйылгы конкуруска 8 үҥкүү бөлөҕө уонна баҕа өттүнэн биир сольнай үҥкүү кыттыыны ыллылар.  Үҥкүү коллективтара бары санааларын ууран, сүргэлэрэ көтөҕүллэн, ох курдук оҥостон, таннан-симэнэн үҥкүү бырааһынньыгын тыынын толору биэрдилэр. Хас биирдии тахсыбыт үҥкүү  туһунан ис хоһоонноох, көрөөччүнү үөрдэр-көтүтэр, ардыгар тургутар, турукка киллэрэр кутун таарыйар умсугутуулаах үҥкүүлэри сөҕө-махтайа биһирии көрдүбүт.

Нэһилиэкпит баһылыга Евгений Сергеевич Ушницкай истиҥ иһирэх тылынан эҕэрдэлээтэ, олохтоох дьаһалта аатыттан конкуруска кытта кэлбит коллективтар салайааччыларыгар махтал сурук, сэмэй бэлэх туттартаата.

Конкурс түмүгэр дьүүллүүр сүбэ бэрэссэдээтэлэ Любовь Алексеевна хас биирдии үҥкүүгэ кыттааччыларга тустарыгар туһаныахтара диэн үгэс быһыытынан ырытыы оҥордо.  Таһым былырыыҥҥы күрэхтэн лаппа үрдээбит диэн үөрэн бэлиэтээтэ.

Конкурс түмүгэ:

Дьокуускайтан Республикатааҕы  үһүс көлүөнэ оскуолатын «Вдохновение-Иэйии» ансаамбыла Гран — При үрдүк аатын ылан муҥутуур кыайыылааҕынан таҕыстылар, салайааччы Александра Троева. «Ымыйаана» үҥкүү ансаамбыла — I ст.  Лауреат, салайааччы Эдуара Сергеева. «Сыдьаайа» үҥкүү коллектива — II ст. Лауреат салайааччы: Анжелика Ноговицына.«Ситим» Нам селота 3 көлүөнэ оскуолатын бөлөҕө — III ст. Лауреат салайааччы Сатабыл Кэрэмэс Саргы.  «Айыы Хотун»  үҥкүү ансаамбыла — Дипломант I ст.  салайааччы Оксана Кудрина. «Түһүлгэ»  бэтэрээннэр үҥкүү ансаамбыла — II ст. Дипломант салайааччы Марианна Цыпандина. «Кыталыына»  үҥкүү бөлөҕө —  III ст. Дипломант cалайааччылар Владислав Николаев,  Павел Винокуров.«Дьоһун саас» үҥкүү ансаамбыла — «Көрөөччү биһирэбилэ» cалайааччы Мария Слепцова.  Ильина Любовь Дмитриевна — «Үҥкүүгэ бэриниитин иһин» анал ааттары ыллылар.

Тэрээһиммитигэр кыттыыны ылбыт биир санаалаах дьоммутугар, күрэх кыттыылаахтарыгар «Түһүлгэ» норуот айымньытын киинин, олохтоох дьаһалта аатыттан махталбытын биллэрэбит. Өрүүтүн бу курдук түмсүүлээх, көхтөөх, чэгиэн сылдьыҥ.