Бүгүн нэһилиэкпит биир кырдьаҕас дириҥ историялаах «Арыы Тиит» түөлбэтигэр беседка үөрүүлээх арыллыытыгар анаммыт бырааһынньык буолан ааста.  

 Олоҕу кытары тэҥҥэ инники күөҥҥэ сылдьар түөлбэҕэ былырыын оҕо – аймах аралдьыйар, сынньанар площадкаламмыта, билигин сэргэстэһэ, олорон сынньанар, хаххаланар аныгылыы эстэтичэскэй көстүүлээх беседка дэндэйэн таҕыста.  Анамммыт тутуу оҕону-урууну, улахан да дьону түмэн үтүө сыһыаны үөскэтэр эйгэтэ буолуо.  Манна түмсүүлээх түөлбэ олохтоохторо бырааһынньыктарын, чэбдигирдэр тэрээһиннэри  ыытыахтара турдаҕа.

Аалай лиэнтэни кырыйдылар: нэһилиэк баһылыга Евгений Сергеевич Ушницкай, түөлбэ аҕам саастаах олохтооҕо, үлэ бэтэрээнэ, нэһилиэк ытык киһитэ, наставник Елена Николаевна Жиркова, беседка тутуутун биригээдэтиттэн, түөлбэ олохтооҕо Иван Ильич Бурнашев.

Тутуу кэмигэр суобуотунньукка түөлбэ олохтоохторо бары кыттыыны ыллылар, оҕотуттуна аҕам саастааҕар тиийэ туора турбакка сомоҕолоһуу баарын, үлэ дьону түмэрин көрдөрдүлэр.

Үөрүүлээх быһыыга-майгыга тустаах дьоҥҥо махтал, эҕэрдэлэр этилиннилэр, кэрэ ырыа дьиэрэйдэ, площадка оҕо саҥатынан туолла. Истиҥ ҕэрдэ, махтал тыллар иһилиннилэр, ырыа ылбаҕайа ылланна, оҕолор түөлбэлэрин инниктин ыра санааларын уруһуйдаабыттарын түмүгүн биллэрдилэр. Бу курдук олус истиҥ, үөрүүлээх, сэргэх тэрээһин буолан ааста.

Өссө да саҥа былааннар, бырыайыактар олоххо киирэ турдуннар. Нэһилиэкпит күнтэн күн туругура тупсан истин. Кэлэр кэнчээри дьоммут кэрэ эйгэҕэ улааттыннар.