Бырааһынньыктааҕы ТҮҺҮЛГЭ

Хамаҕаттабыт нэһилиэгэр, кулун тутар 7 күнүгэр, сааскы маҥнайгы  бырааһынньыгы, Аан Дойдутааҕы Дьахталлар күннэрин  көрсө «Эбээ- диэн муударас» тэрээһин “Түһүлгэ» норуот айымньытын киинигэр ис сүрэхтэн ыытылынна. Тэрээһини СР үөрэҕириитин туйгуна, алын сүһүөх учууталынан өр сылларга үлэлээбит, уус-уран самодеятельность биир бастыҥ кыттааччыта, чабырҕахсыт, «Айыы Хотун» үҥкүү коллективыгар дьарыктанар Матрена Васильевна Канаева иилээн-саҕалаан ыытта.

Бу киэһэ, биэс түһүмэхтээх түһүлгэҕэ, бары да биир эйгэлээх, үтүөнү кэрэһэлиир, сырдыгынан сыдьаайар, эйэҕэстэй эбээлэр кытыннылар: 

1.         Егорова Арчылаана Андреевна– СР сайдыытыгар үрдүк кылаатын иһин, СР Дьиэ кэргэнин политикатын сайдыытыгар кылаатын иһин, Нам улууһа уонна Хамаҕатта нэһилиэгин сайдыыларын иһин бэлиэлээх, улуустааҕы дьахталлар түмсүүлэрин чилиэнэ, «Суорумньу» билсиһии кулууб салайааччыта.

2.         Лазарева Вера Дмитриевна  — СР сибээһин бастыҥ үлэһитэ, үлэ бэтэрээнэ, тойуксут, оһуохайдьыт, “Сөрүө» түмсүү актыбыыһа, чилиэнэ.

3.         Пухова Анастасия Ивановна–“Хамаҕатта нэһилиэгэ” МТ сайдыытыгар кылаатын иһин, СР дьахтар хамсааһыныгар кылаатын иһин грамоталаах, “Тупсууна» дьахтар сэбиэтин чилиэнэ.

4.         Сивцева Мотрена Иннокентьевна  — улуустааҕы инвалидтар обществоларын актыбыыһа, “Дьулуур» инвалидтар обществоларын председателэ.

5.         Евдокия Романовна Федотова –  «Айыы Хотун» ансаамбыл, түмсүү үҥкүүһүтэ, актыбыыһа.

6.         Ядреева Светлана Владимировна —  “Умсулҕан» иис-уус  түмсүү иистэнньэҥэ, актыбыыһа.

      «Кэпсээри кэллим” түһүмэххэ талааннарын көрдөрдүлэр, дьиэ кэргэттэрин, туох дьарыктаахтарын билиһиннэрдилэр.

     «Эбээ сүбэтэ, алгыһа, үгэһэ”түһүмэххэ Арчылаана Андреевна сиэннэрни сахалыы саҥарарга, сатаан эҕэрдэ тыллары этэргэ үөрэтэрин кэпсээтэ, сиэнэ Түмэн Прокопьев аныгы тик-ток үҥкүүлээн сөхтөрдө, Вера Дмитриевна куһаҕаны оҥоруу үчүгэйгэ тиэрдибэтин, үчүгэй тыллары элбэхтик этии наадалааҕын, дьоҥҥо туһалааҕын сиэннэригэр тоһоҕолоон үөрэтэрин билиһиннэрдэ, Анастасия Ивановна олоҥхо тылыгар-өһүгэр, сахалыы саҥарарга болҕомтолоохтук сыһыаннаһан сиэннэрин такайарын иһитиннэрдэ, патриотическай иитиигэ оччотооҕу сэрии, кыайыы ырыаларын оҕо-сиэн билиэхтээҕин туһаайда, сиэнэ Сандал Васильев “Мин мантан сэриигэ барбытым» ырыаны ыллаата, Евдокия Романовна саха остуол оонньууларын сэргээн оонньуулларын сэһэргээтэ, сиэнинээн Сахаайалыын саха өс хоһооннорун ситэрсэн сыанаҕа оонньоон көрдөрдүлэр, Светлана Владимировна сиэннэрин халлаан сылыйда да суббуотунньук өйдөбүлүгэр үөрэтэрин, айылҕаны харыстыы, ыраастыы сылдьарга үөрэтэрин кэпсээтэ, Мотрена Иннокентьевна спорду сөбүлүүрүн, сиэннэрин дьарыктаан күрэхтэри тэрийэрин, сайылыкка тахсан сайылаан, үлэлиири кэпсээтэ.

       Ас астааһын бэйэтэ туспа үлэ, дьарык, сатабыл буоларын «Эбээ күндүлүүр минньигэс аһа»түһүмэххэ хото ас астаан кэлэн көрдөрдүлэр, күндүлээтилэр.

      “Биһиги актыбыыстарбыт” түһүмэххэ кыттааччылар үлэлэһэр общественнай түмсүүлэрэ эҕэрдэлээтилэр, бырааһынньык түһүлгэтин ыллаан киэргэттилэр.17 сыл устата билсиһии кулуубун тэрийэн үлэлии  сылдьар Арчылаана Андреевнаны Горнай улууһуттан суорумньуһут Альбина Султашова  видеонан эҕэрдэлээтэ, Арчылаана  160 паараны кытта үлэлэһэн ыал оҥортоон дьиэ кэргэн бэлиитикэтигэр  сүдү кылааты киллэрсэ сылдьарын бэлиэтээтэ.

     «Сөрүө” түмсүү салайааччыта Мария Аманатова Вера Дмитриевнаны, үтүө холобурбутунан буолар, алгыһынан сылдьар, элбэх идеялаах чилиэн буоларын киэн тутта аҕынна, видеоклибынан ис сүрэхтэн ыллаан эҕэрдэлээтэ. Анастасия Ивановнаны                                                

     “Тупсууна” түмсүү тойугунан туойан истиҥник эҕэрдэлээтилэр. Эдэр ийэ, ырыаһыт Мария Соловьева Анастасия Ивановна кыыһа Оксана «Ытык маллар” хоһоонугар матыыб айбытын ыллаабыта сүрэҕи долгуппутун көрөөччүлэр үтүө тылынан аҕыннылар.

     Улуустааҕы инвалидтар обществоларын актыбыыһын, “Дьулуур» инвалидтар обществоларын председателин Мотрена Иннокентьевнаны улуус уонна Хамаҕатта нэһилиэгин бииргэ үлэлэһэр доруобуйаларынан хааччахтаах дьону салайар түмсүүлэрэ үөрүү-көтүү көтөллөөх эҕэрдэлээтилэр, инниккигэ дьулуурдаахтык этэҥҥэ сылдьан тэтимин ыһыктыбакка салгыы үлэлииригэр баҕа санааларын тиэртилэр.

      Евдокия Романовнаны «Айыы Хотун” ансаамбыла “Кини кимий?” норуот ырыатынан хоһуйан ыллаатылар, Евдокия имигэстик хамсанарын, ансаамбыл биир бастыҥ үҥкүүһүтэ буоларын биһирээтилэр.

      «Умсулҕан» иис-күүс түмсүүтэ Светлана Владимировна ураннык тикпит панноларын, сахалыы көбүөрдэрин, олбохторун биир биир кэпсээн сырдаттылар, түмсүү биир ситиһиилээх чилиэнэ, иистэнньэҥэ буоларын истиҥник аҕыннылар.

«Дьахтар сааһыттан тутулуга суох — кэрэ. Саас диэн сыыппара эрэ, ким даҕаны маанытык, уратытык таҥнары боппотоҕо. Ис турукпут тугу сипсийэринэн, баҕа санаабыт салайарынан таҥныахха” диэн ыытааччы саҥатынан   «Эбээ мааныга кэтэр таҥаһа» түһүмэххэ кыттааччы эбээлэрбит бииртэн биир мааны киэһээҥҥи былааччыйалары кэтэн хараҕы манньытар түһүмэххэ хаамсан киирдилэр.

      Ураты киэһэҕэ эр дьон аатыттан Александр Захаров, Михаил Макаров эҕэрдэлээтилэр, ырыа бэлэх ууннулар.

Сырдык, наҕыл тэрээһин сүбэтигэр нэһилиэк общественнай олоҕор кыттыһар “Барахсаана» түмсүү салайааччыта Заровняева А.З., “Кэскилээнэ” түмсүү салайааччыта Новгородова Р.С. уонна Макаров М.М. -“Эркин» түмсүүттэн үлэлээтилэр, кыттааччы эбээлэргэ сөптөөх анал ааттаах лиэнтэлэри олохтоотулар. Ол курдук:

—           “Хомоҕой тыллаах Эбээ” — Анастасия Ивановна Пухова- 2 оҕо күн күбэй ийэтэ, 5 сиэн эбээтэ

—           «Талба талааннаах Эбээ» — Арчылаана Андреевна Егорова- 3 оҕо күн күбэй ийэтэ,  3 сиэн эбээтэ

—           «Илгэлээх Эбээ» — Вера Дмитриевна Лазарева – 3 оҕо күн күбэй ийэтэ, 5 сиэн эбээтэ.

—           «Мааны Эбээ» — Евдокия Романовна Федотова- 4 оҕо күн күбэй ийэтэ, 5 сиэн эбээтэ

—           «Сэргэх Эбээ» — Мотрена Иннокентьевна Сивцева – 4 оҕо күн күбэй ийэтэ,   сиэн эбээтэ.

—           «Үтүө эйгэлээх Эбээ» — Светлана Владимировна Ядреева – 4 оҕо күн күбэй ийэтэ, 9 сиэн эбээтэ ааттаннылар, саха ыалыгар эбээ диэн муударас, күндү киһи буоларын бигэргэттилэр, тэрээһини ураты суолталаатылар, күн сардаҥатын кэриэтэ тулабытын сырдатан сылааһынан сыдьаайдылар.

       «Кыыс, Дьахтар, Ийэ,  Эбээ өрүү үтүө майгыларынан, сайаҕас, амарах санааларынан көлүөнэттэн көлүөнэҕэ Таптал, Үтүө санаа уонна Эрэл курдук үйэлээх сыаннастары иҥэрэн өрүүтүн ытыктана, таптана турдуннар!» — диэн истиҥ тыллардаах мааны киэһэ түмүктэннэ.