Айар куттаах Любовь Иванова бэрт үгүс салааҕа талааннааҕа айар биэчэригэр билиннэ.  Кини сэмэй дьоҥҥо киирсэрэ манна көһүннэ. Ол курдук, бу күн ыалдьыттар, хамаҕатталар «Олох быстыбат ситимэ» кинигэни, «Сурукка тиспит иэйиилэрим» ырыа-хоһоон хомуурунньугун кытта билистилэр. Любовь Иванова иккис кинигэтэ күн сирин көрбүтүгэр күүс-көмө буолбут олохтоох дьаһалтаҕа, баһылыкка Евгений Ушницкайга махтанарын биллэрэр. Биһиги Любовь Васильевнабыт ырыанан, хоһоонунан эрэ үлүһүйбэккэ уонна муҥурдаммакка уруһуйдуурун, дэйбиир, кумааҕынан кырыйан хартыыналары оҥорорун, тойуктуурун киэн тутта кэпсиибит. Холобура, балачча киһи билбэтэ буолуо хартыыналары оҥорорун. Дэгиттэр талааннаах  Любовь Васильевна Иванованан биир бэйэм киэн туттабын.

Бүгүҥҥү үөрүүгэ Любовь Иванова доҕотторо, Хамаҕатта самодеятельноһын артыыстара кыттыһаллар. Ол курдук, ыам ыйа саҕаланыыта «Түһүлгэ» НАК дьиэтигэр барыта иһилиннэ – баян, үҥкүү, тойук, хоһоон, ырыа. Үтүө санаалаах Любовь Иванова талаанын дьоно-сэргэтэ таба көрөн, өйөөн дьэ, биллэрдэ!

Ити курдук, урукку сылларга ВИА бөлөххө солискалаан, ыллаан саҕалаабыт Любовь Васильевна айар киэһэтигэр аймах дьоно, доҕотторо, ыалдьыттар, түөлбэлэр салайааччылара, олохтоохторо тыл бастыҥын эттилэр. Ол курдук, Любовь Иванова үлэлээбит улуустааҕы ОДьКХ салайааччыта Николай Игнатьев, нэһилиэк маастара Егор Кудрин, Хамаҕатта баһылыга Евгений Ушницкай уонна нэһилиэк билиниитин, тапталын ылан баһылыгынан үтүө суобастаахтык, таһаарыылаахтык үлэлээбит Иван Максимов дьиэ кэргэнинээн кэлэн эҕэрдэлээтилэр. Быйыл «Түһүлгэ» НАК көҕүлээһининэн «Хамаҕатта нэһилиэгин култууратын сайдыытыгар кылаатын иһин» түөскэ анньыллар бэлиэни директор Антонина Харитонова үөрүүлээх быһыыга-майгыга туттарда. Эбэн эттэххэ, айар кэнсиэргэ эҕэрдэлээччилэр Любовь Васильевнаны «бэрт сэмэй» диэн этэллэрин директор Антонина Харитонова чопчулуур.

«Кулуупка үлэ үгэнигэр олорор түгэннэрбэтигэр, «мэһэйдээбэтэх киһи» диэн санааны тутуһар Любовь Васильевнабыт дьоро киэһэтэ үүммүтүттэн үөрэбит», – диир Антонина Алексеевна.

Киһи быһыытынан көнө майгылаах Любовь Васильевна «Түһүлгэ» НАК дьиэтигэр күүтүүлээх ыалдьыттарбытыттан биирдэстэрэ буолар. Саха киһитэ ханна кэлэр, үгүстэ тохтоон ааһар сиригэр куруук илии тутуурдаах сылдьааччы. Ол курдук, бүгүҥҥү күҥҥэ үгэс умнулла илигин Любовь Иванова туоһулуур. Дьоҥҥо үтүө сыһыан, үксүгэр, кэргэннии дьон биир өйгө-санааҕа кэлиилэриттэн, биир халыып буолууларыттан көстөр. Ол курдук, өр сылларга олохтоох дьаһалтаҕа суоппардаабыт кэргэнэ Аркадий Иванов үгүстэргэ үтүө холобур буолар, көмөлөспүт эр киһи. Төрөппүттэрин холобурдарынан оҕолоро Римма, Мария, Наталья, Андрей, сиэннэрэ олороллор.