Кэнникки кэмҥэ үйэ уларыйан, сайдан кыра дохуоттаах дьиэ кэргэттэри, үлэтэ суох, бэйэ дьыалатын тэринэр баҕалаах дьону социальнай контрагынан республика өйүүр буолбута барыбытын үөрдэр. Алтынньы 28 күнүгэр, Хамаҕатта нэһилиэгэр нэһилиэнньэни ыраас иһэр уунан хааччыйар пуун аанын тэлэччи аста.  «Эрэл уу” пуунун  Ньурба улууһуттан төрүттээх Хамаҕаттаҕа күтүөт уол Николаев Альберт Васильевич  арыйан, олохтоохтору үөртэ.

       Бу бэлиэ түгэни ыытаары, бэлэмнэнээри сылдьан, биһиги «Түһүлгэ” норуот айымньытын киинин үлэһиттэрэ Альберт Васильевичтыын бииргэ буоллубут, сценарий суруйаары көрсөн кэпсэтиибитигэр Альберт бу курдук хоруйдаата: “Билигин киһиэхэ ыраас уу олус наада. Уу киһи доруобуйатыгар наадалааҕын дьон барыта өйдөөн эрэр дии саныыбын. Бэйэм Хамаҕаттаҕа олохсуйан олорор кэмнэрбэр ыраас иһэр уу суоҕуттан эрэйдэнэр этим. Нам кииниттэн атыылаһаары, уу куттараары  гыннахпына үгүс күдьүмэҕэйдэри көрсөрүм, ол иһин мин бу пууну  эрдэттэн толкуйдаан баҕаран туран арыйдым. Бэйэ дьыалатын тэринэргэ сананан, биисинэс былаан суруйа охсон, соцконтракт балаһыанньатыгар докумуоннарбын биэрэн көмүскээбитим, былааммын хамыыһыйа бигэргэтэн, үлэбин саҕалаабытым уонна бу 2023 Үлэ сылыгар арыллыбытынан наһаа үөрдүм…” — диэн Альберт санаатын үллэһиннэ, көмө буолбут олохтоох дьаһалта баһылыгар Евгений Сергеевичка, специалиска Алена Васильевнаҕа махтала муҥура суоҕун үөрэн кэпсээтэ. Саха Республикатын үлэҕэ уонна социальнай сайдыыга министерствотын Намнааҕы управлениятын өйөбүлүнэн социальнай контракт түһэрсэн государственнай социальнай көмөнөн Ыраас уу пуунун оборудованияларын атыыласпытын сэҥээрэ иһиттибит.

       Үөрүүлээх бэлиэ түгэн аалай лиэнтэни кырыйыыттан саҕаланна, лиэнтэни “Хамаҕатта нэһилиэгэ”МТ баһылыга Е.С.Ушницкай, салайааччы А.В.Николаев уонна Захаров Р.А.- Альберт доҕоро, наставнига кырыйдылар. Салгыы ынырыыбытын ылынан кэлбит ыалдьыппыт, улууспут алгысчыта Охлопков Петр Васильевич – Алгыс Бүөтүр аал уоту оттон, сахалыы сиэри-туому толордо, арчылаата, алгыстаата. Сиэр-туом толоруутун «Сахам алаадьыта» ырыанан уус-уран актыбыыһа, ырыаһыта Саргылана Назарова ситэрдэ. Эдэр дьоҥҥо холобур буолар саҥа урбааньыты Хамаҕаттабыт баһылыга Евгений Сергеевич эҕэрдэлээтэ, саҕалааһын инникитин кэскиллэнэн, ситиһиилэнэн  өссө да үүнэн-сайдан кэҥээн иһэригэр эрэлин биллэрэн илии тутуста…

Бэлиэ түгэн кыттыылаахтара, олохтоохтор, нэһилиэкпит дьаhалтата нэhилиэк ыраас ууга наадыйарын ѳйдѳѳн улахан көмө буолбуттарыгар, иhэр уу боппуруоhа сытыы кыhалҕатын толкуйдаабыт урбаанньыт Альберт Васильевичка махталларын тиэртилэр, дьон-норуот туhугар «Эрэл уу” пууна үлэлээн кэскиллээх суолга сирдиэ диэн эрэннилэр. Түмүккэ, сана урбаанньыт оборудованияларын кэпсээтэ уонна биир бытыылка ууну сүүрдэн көрдөрдө, толору  бутилированнай ууну Алгыс Бүөтүргэ махталын биллэрэн бэлэх уунна. Аны мантан ыла нэһилиэнньэ хайа баҕарар ыраас ууну иһэн доруобуйатын тупсарар кыахтанна.