Бүгүн, ахсынньы 1 күнүгэр, Саҥа Дьыллааҕы күөх харыйа уота күлүмүрдүү сандаарда. Бүгүҥҥү күн «Кыһын Саха сириттэн саҕаланар» кыһыҥҥы бэстибээл биир суолталаах тэрээһининэн буолар. Үөрүүлээх чаас, 2023 сыл түмүгүнэн, нэһилиэккэ ыытыллыбыт сүрүн үлэлэр ситиһиилэрин бэлиэтээһинтэн саҕаланна. Ол курдук,:“Комсомольскай” уулусса суолун оҥоһуллуута, «Арыы Тиит” түөлбэҕэ сынньалаҥ беседка, «Кытыл” түөлбэҕэ “Тотоойу” сана маҕаһыын, саҥа олохтоох дьаһалта дьиэтэ, ону тэҥэ библиотека дьиэтэ тупсарыллан арылыннылар, элбэх оҕолоох ыаллар саҥа кварталларыгар газ, уот ситимнэрэ үлэҕэ киирдилэр. Бэрт сотору 4 этээстээх, элбэх квартиралаах дьиэ үөрүүлээх арыллыыта буолаары турарын үөрэ иһиттибит. Үүнээри турар 2024 сыл өссө үрдүк ситиһиилээҕэр эрэнэн туран оҕо-аймаҕы, олохтоохтору нэһилиэк баһылыгын солбуйааччыта Владилен Николаевич Москвитин эҕэрдэлээтэ. Күөх харыйа уотун сандаардар күүтүүлээх ыалдьыттара Тымныы кырдьаҕас, сиэнинээн Хаарчааналыын, сыарҕалаах акка олорон кэлбиттэрэ мустубут дьон болҕомтотун тарта. Бары оҕолорго, олохтоохторго ыалдьыттарбыт эҕэрдэлээн алгыстарын эттилэр, эйэлээх олоҕу, үгүс ситиһиини баҕардылар.
Тэрээһин муҥутуур түгэнинэн, Симэммит Күөх Харыйабыт уотун үөрүүлээх быһыыга-майгыга сандаардыы буолла!
Бүгүҥҥэттэн, ахсынньы 1 күнүттэн, Хамаҕаттабытыгар Саҥа Дьыл тыына биллиэ. Мантан салгыы Саҥа Дьылга бэлэмнэниилэр, бырааһынньык иннинээҕи өрө көтөҕүллүү туруга хас биирдиибитин кууһан, үөрүүлэр — көтүүлэр саҕаланыахтара турдаҕа!
Умнуллубат түгэни бэлэхтээбит, кэрэни үксэппит олохтоох Дьаһалта (МАУ тэрилтэ – сал.Абрамов В.В.) үлэһиттэригэр, кыттыыны ылбыт уус-уран самодеятельность актыбыыһыгар Индеев В.И, эдэр ийэҕэ Барашкова О.С., кырачаан кыттааччыбытыгар Уйгулаана Барашковаҕа, атынан хааччыйбыт олохтоохторбутугар Харитонов Н.Н., Назаров А.П. улахан махталбытын тиэрдэбит.