Муус устар 18 күнүгэр (2025сыл) Нам улууһун Хамаҕатта нэһилиэгэр СӨ норуот айымньытын дьиэтин (ген.дир. Семенов С.С) көҕүлээһининэн, Хамаҕатта нэһилиэгин «Түһүлгэ” норуот айымньытын киинин (дир.Харитонова А.А) тэрийиилэринэн “Биллэр ырыалар биллибэт ааптардара” кэнсиэр  бэһис   түһүмэҕэ ыытылынна. Бу  бырайыакка Эҥсиэли хочотун нэһилиэктэриттэн Түбэттэн — Анюта Федорова, Аскалон Егоров — Өркөн Дьол, Сардана Харитонова, Хатырыктан — Афанасий Татаринов, Дьол Сандаара, Ирина Винокурова, Бөтүҥтэн-Татьяна Кириллина, Надежда Макарова, Хатыҥ-Арыыттан – Люция Евсеева-Суһумнуура, Намтан — Елена Кутукова, Николай Уваров, Афанасий Иванов, Николай Протопопов, Елена Нам-чы, Мария Григорьева – Маайа Хамаҕаттаттан — Сандаара  Оротоо, Светлана Новгородова, Руслан Захаров,  Любовь Иванова – Куоһаана, Татьяна Гаврильева, Никольскайтан — Зинаида Нератова – Тупсууна, Үөдэйтэн – Ирина Неустроева, уопсайа 22 мелодист норуокка киэҥник тарҕаммыт дьон дууһатыгар иҥэн сылдьар ырыаларынан кытыннылар.

         Ааптардар айымньыларын «Дьүөгэлэр»,«Нарыйаана, «Кытыл кыыма»,«Ай-ыллаа», «Ил Куо», «Намылы», «Дьол тыына» «Ырыа кынат» улууска, республикаҕа биллэр ырыа ансаамбыллара, кэрэ мааны куоластаах Анна Нестерова, кэргэннии дуэт Вера, Рустам Федоровтар, эстрада сулуһа, ырыаһыта Ильдар олус иэйиилээхтик истиҥник толордулар.    Кэнсиэрбит саҕаланан ортолоон сытыырхайар, үрдүүр кэмигэр, кыттааччыларбыт  этэллэринии – уот баран «форс-мажор”-даах, икки түһүмэхтээх (уоттаах, уота суох) ураты кэнсиэр  буолла. Хамаҕатта култууратын үлэһиттэрэ «уот барда” диэн турбакка, өссө тэптэрэн биэрэн сотовай төлөпүөн уоттарынан, тыыннаах доҕуһуолларга (баянынан, гитаранан, акапел) кыттааччылары, көрөөччүлэри ыллаттыы ньыматын толкуйдуу охсон,  кэнсиэри салгыы ыытан дьон-сэргэ биһирэбилин ылыан ыллылар.  

         Салгыы уоту кэтэһэ таарыйа СӨ норуот айымньытын дьиэтин генеральнай дириэктэрэ,бу бырайыак ааптара, Семенов Сергей Степанович Саха ырыатын туһугар үгүс үтүөнү саҕар, үйэлээҕи айар-тутар ааптардары эҕэрдэлээн туоһу суруктары туттартаата, бары кыттааччылары махтал суруктарынан наҕараадалаата.

         Түгэнинэн туһанан, «Түһүлгэ” кэллэктиибин сыралаах үлэлэрин бэлиэтээн туран, дириэктэр Харитонова Антонина Алексеевнаҕа Бочуотунай грамотаны  туттарда.

        Бу курдук, тэрийэн, ыллаан-туойан, Нам улууһун култууратын ырыа айан киэргэтэр, биир уратылаах, ырыа айар куттаах дьоммут ылбаҕай ырыаларын дьоро киэһэтэ, үгүс көрөөччүлэр, истээччилэр, биир дойдулаахтарбыт сыаналааһыннарынан «үрдүк таһымҥа чаҕылхайдык, уратытык”буолла, “форс-мажор” буолан көрөөччү өйүгэр ордук хатанна.

        Аны да, “Биллэр ырыалар, биллибэт ааптардара” бырайыак Сахабыт сирин улуустарыгар сэргэхтик тэриллэн, элбэх ырыа ааптардарын, ырыаһыттарын өрүү түмэ турдун!

Суруйда Гаврильева Т.М. –  «Түһүлгэ” норуот айымньытын киинин уус-уран салайааччыта