Арассыыйаҕа Дьиэ кэргэн, Саха Өрөспүүбүлүкэтигэр Оҕо саас, Нам улууһугар Оҕо спордун, Хамаҕатта нэһилиэгэр доруобуйа сыла биллэриллэн, Хамаҕатта  нэһилиэгэр сылы арыйыы тэрээһинигэр «Түһүлгэ»  норуот айымньытын дьиэтигэр нэһилиэк бары тэрилтэлэрэ муһуннулар.

Бэлиэ сылы  арыйыы, үөрүүлээх быһыыга-майгыга «Дьону олоҕу таптыахха» диэн ааттанан, Хамаҕатта өрөгөйүн ырыатынан саҕаланна. Бу сыллар чэрчилэринэн тэрилтэлэр саҥа сылы уруйдуу көрсөллөрүн, үлэ хайысхата бу сылларга ананарын сырдаттылар.

     Арассыыйаҕа Дьиэ кэргэн сылынан,  дьоһун олоҕу олорбут, оҕону иитиигэ, үлэҕэ-хамнаска уһуйууга, 2023 сылга  олорбуттара 50 уонна  55 сылларын туолбут,  чиэскэ-бочуокка сылдьар дьиэ кэргэттэрбитин бэлиэтиир, билиһиннэрэр тоҕоостооҕун бэлиэтээн туран, бу бэлиэ күҥҥэ кыттыыны ылалларыгар ыҥыран үрдүк сыанаҕа биир биир ааттаан таһаардыбыт. Ол курдук:

Александр Николаевич, Надежда Варламовна Федоровтары —  РФ “За любовь и верность” мэтээллээх, СӨ “Дьиэ кэргэн килбиэнэ” бэлиэлээх, “Саха сирин кыһыл көмүс дьиэ кэргэттэрэ”,

“ Нам улууһун Бастыҥ дьиэ кэргэттэрэ “  Бочуот кинигэтигэр киирбит  дьиэ кэргэни;

Спиридон Николаевич, Евдокия Егоровна Канаевтары — РФ “За любовь и верность” мэтээллээх, СӨ  “Дьиэ кэргэн килбиэнэ” бэлиэлээх дьиэ кэргэни;

Роман Степанович, Парасковья Михайловна Софроновтары — РФ “За любовь и верность” мэтээллээх, СӨ  “Дьиэ кэргэн килбиэнэ” бэлиэлээх,  “ Нам улууһун Бастыҥ дьиэ кэргэттэрэ” Бочуот кинигэтигэр киирбит  дьиэ кэргэни;

Иван Егорович, Зинаида Исаевна Кривошапкиннары — СӨ “Дьиэ кэргэн килбиэнэ” бэлиэлээх дьиэ кэргэни;

Афанасий Михайлович, Мария Григорьевна Бурнашевтары – РФ “За любовь и верность” мэтээллээх, СӨ  “Дьиэ кэргэн килбиэнэ” бэлиэлээх,  Нам улууһун “Үтүө холобур” анал ааттаах дьиэ кэргэни;

      Бары дьиэ кэргэттэри, олохтоохтору, тэрилтэлэр салайааччыларын, оҕолору Хамаҕатта нэһилиэгин баһылыга Евгений Сергеевич Ушницкай бу бэлиэ күнүнэн эҕэрдэлээтэ, дириҥ ис хоһоонноох олоҕу олорон кэлбит, нэһилиэк үтүө холобурга сылдьар дьиэ кэргэттэринэн  киэн туттарын этэн туран махтал тылларын тиэртэ.Үлэ ветерана, Хамаҕатта нэһилиэгин бочуоттаах олохтооҕо, Хамаҕатта нэһилиэгин култууратын сайдыытыгар кылаатын иһин үрүҥ көмүс бэлиэлээх Александр Николаевич Федоров, хас биирдии киһиэхэ Дьиэ кэргэн олус күндү суолталааҕын, дьиэ кэргэн- дьоллоох олох төрдө буоларын нэһилиэк олохтоохторугар, ыччаттарыгар сүбэ курдук бэлиэтээтэ, Дьиэ кэргэн сыла биллэриллибитин биһирээтэ. «Түһүлгэ»  норуот айымньытын дьиэтин директора  Харитонова Антонина Алексеевна, Саргылана Гольдерова суруйбут “Дьиэ кэргэн алгыһа» хоһоонун бар дьонугар алгыс кэриэтэ анаан долгуйан туран  аахта, Хамаҕатта нэһилиэгин ырыа куттаах дьиэ кэргэттэрэ Надежда, Михаил Макаровтар, Екатерина, Илья Заболоцкайдар, Татьяна, Владимир Уодайдар ансаамбылынан “Дьол бу сиргэ» ырыаны эҕэрдэлээн ыллаатылар.

      Салгыы нэһилиэкпит  тэрилтэлэрэ   бэлиэ сыллары үллэстэн бэйэлэрэ идеялаан, эҕэрдэ нүөмэрдэринэн киэргэтэн арыйдылар.  Оҕо саас сылынан  «Тускул» оҕо сайдар киинин сэбиэдиссэйэ Местникова Аида Петровна эҕэрдэлээтэ, иитэр оҕолорбутун сахалыы саҥарарга үөрэтии наадалааҕын, улуус, өрөспүүбүлүкэ таһымнаах оҕолорго аналлаах проектар  үлэлииллэрин туһунан сырдатта. Эҕэрдэҕэ кыттыһан «Ымыычаана» улахан группа оҕолоро полька үҥкүүнү бэлэхтээтилэр, Соловьева Юля чабырҕахтаата, «Сулусчаан» бэлэмнэнии бөлөҕө Валерий Егоров мелодиятыгар  «Мин Намы таптыыбын» ырыатын ыллаатылар.

      Салгыы Оҕо сылынан Намнааҕы З.П. Винокуров аатынан оҕо искусствотын оскуолатын Хамаҕаттатааҕы филиалын сэбиэдиссэйэ Сивцев Юрий Александрович эҕэрдэлээтэ, «Музыка для всех» проект күүстээхтик үлэлиирин,оҕо киһи быһыытынан ситэн, үүнэн, кыаҕыран тахсыытыгар, тулалыыр эйгэҕэ сыһыаныгар, дьоҕурун арыйыытыгар оҕо искусствотын оскуолатыгар төрөппүттэр оҕолорун үөрэттэрэллэригэр ыҥырда.  Хореография кылааһын үөрэнээччилэрэ «Радуга» оҕо үҥкүү коллектива “ Весенний звон” классическай үҥкүүнү бэлэхтээтилэр (салайааччы Попова Октябрина Ивановна), фортепиано отделениетын 4 кылааһын үөрэнээччитэ Амелия Булдакова Герман Комраков музыкатыгар вальсы фортепианоҕа оонньоото (преподователь Захарова Сардана Михайловна).

Быйылгы сыл,  Нам улууһугар  Оҕо спордун сылынан биллэриллэн, оҕо спордун өрө тардыыга сыаллар-соруктар тураллара саарбаҕа суох. Оҕо спордун сылын түһүмэҕин Е.М. Шапошников аатынан орто оскуола директора Дьяконов Анатолий Михайлович үөрэнээччилэр спортка үрдүк ситиһиилэрин кэпсээтэ, оҕо спорда доруобуйаны, бэрээдэктээх буолууну, өй-санаа, майгы-сигили хаачыстыбаларын ирдиирин үөрэнээччилэргэ сүбэлээн эттэ, салгыы оҕолор спортка кыһанналларыгар, дьулууру-тулууру күүһүрдэллэригэр ыҥыран, бэйэтин  холобурун спортсмен быһыытынан сайдыбытын, волейбол, чэпчэки атлетика көрүҥнэригэр  күн бүгүҥҥэ диэри дьарыктанарын, спорт саалаҕа элбэхтик сылдьарын холобурдаан киэҥ ис хоһоонноох эҕэрдэтин тиэртэ. Орто оскуола иһинэн тэриллибит «Саҥа көлүөнэ» оҕолор түмсүүлэрэ спортка сыһыаннаах лозуннарын этэн, спортивнай үҥкүүнэн үөрүүнү үллэһиннилэр.

         В.П.  Артамонов аатынан саха боронсуус лиссиэйин аатыттан директоры иитэр үлэҕэ солбуйааччы Новгородова Светлана Софроновна лиссиэй физкультураҕа учууталлара Россия, Өрөспүүбүлүкэ таһымнаах ситиһиилэрдээх, спорду сайыннарыыга элбэх кылааттаах  учууталларынан киэн тутунна,  спортка ситиһиилээх үөрэнээччилэрин билиһиннэрэн кэпсээтэ, оҕо спордугар сыһыаннаах инникки былааннар сүрүн өттүн сырдатта. Эҕэрдэҕэ кыттыһан республикаҕа, улууска биллэр  «Биир ситим» оҕо түмсүүтэ аныгы үҥкүүнү бэлэхтээтилэр.

        Хас биирдии киһиэхэ доруобуйабыт  улахан, тыын боппуруос буоларынан, нэһилиэк дьоно эт-хаан, өй-санаа өттүнэн доруобуйата чөл буоларыгар кыһанан,  доруобай уопсастыба бу мантан үөскүүрүн ыйан  туран нэһилиэкпит баһылыга Евгений Сергеевич Ушницкай, Хамаҕаттаҕа 2024 сылы — Доруобуйа сылынан биллэрдэ. Доруобуйа сылын  көрсө сыанаҕа Гоголева Марина Алесеевнв сэбиэдиссэйдээх Хамаҕаттатааҕы врачебнай амбулатория үлэһиттэрэ таҕыстылар. Быйылгы сылга нэһилиэк олохтоохторо 100% вакцинацияны, флюорографияны, диспансеризацияны баралларыгар сүбэлээтилэр, аныгы ньыманы тутуһан бырааска көрдөрүү анал төлөпүөн нүөмэригэр эрийэн суруттаран ыарыыны  дириҥэппэккэ эмтэнэллэригэр ыҥырдылар. Хамаҕаттатааҕы врачебнай амбулатория 80 сылын көрсө тэрээһиннэр былааннаахтык ыытыллыыларын туһунан кэпсээтилэр. Кириэс Кытыллааҕы  3 №-дээх баһаарынай сулууспаны кытта шефтэһэн нэһилиэк култуурунай, общественнай олоҕор кытталларын сырдаттылар. Кириэс Кытыллааҕы  3 №-дээх баһаарынай сулууспа ( начальник   Стручков Иннокений Валерьевич) байыастара сылы арыйар бэлиэ күҥҥэ кыттыһан эҕэрдэлэрин тиэртилэр.

        Хамаҕатта нэһилиэгин түмсүүлэрэ нэһилиэккэ  ыытыллар бары  тэрээһиннэргэ, сүбэ-мунньахтарга өрүү тэҥҥэ кыттыһаллар, үлэлэһэллэр. Хамаҕаттаҕа тэриллибит «Чэгиэн» кулууб мелодистка Сандаара Оротоо мелодиятыгар суруллубут скандинавскай кулууб гимнын доҕуһуолугар  эти-хааны чэбдигирдэр  хамсаныылары көрдөрдүлэр. Кулууб салайааччыта Аммосова Алена Афанасьевна Доруобуйа сылыгар эппиэтинэстээхтик сыһыаннаһан, чэгиэн буоларга тардыһан, чөл олоҕу тутуһуоҕуҥ диэн ыҥырыылаах  эҕэрдэлээтэ.

         Түмүккэ, Хамаҕатта нэһилиэгэр бэлиэ сылы арыйыы үөрүүлээх, долгутуулаах, күүтүүлээх түгэнинэн  бырааһынньыктааҕы минньигэс торт киириитэ буолла. Нэһилиэк баһылыга минньигэс туордунан  олохтоохтору, оҕолору күндүлээтэ.

Бэлиэ тэрээһин бары кыттыылаахтара, оҕолор, көрөөччүлэр, биир да киһи маппакка минньигэс туортка бары тигистилэр. Норуоппут-дьоммут үөрбүт-астыммыт уоттаах харахтарын көрөн, нэһилиэк кыаҕар эрэннибит,  күүс-уох, эрчим ыллыбыт диэн кэрэ кэпсээннээх бэлиэ тэрээһиммитин уопсай хаартыскаҕа түһүүнэн түмүктээтибит.

Мантан, салгыы Хамаҕатталар биир сомоҕо буолан доруобуйа , чөл олох туһугар туруулаһыахтара, оҕону бэйэ холобурунан иитиигэ үлэлэһиэхтэрэ, үөрэҕинэн-үлэнэн нэһилиэк  инники кэскилин тупсарыахтара!