Аҕа Дойдуну көмүскүүр Улуу сэрии сылларын кэм-кэрдиис төһөнөн ыраатыннарар да, уйаны-хатаны тургутар кэмнэр өйбүтүгэр-сүрэхпитигэр ордук дьэҥкэрэн, өлбөөдүйэн, суолталанан иһэллэр.

   Ыам ыйын 6 күнүгэр Хамаҕатта нэһилиэгэр Улуу Кыайыы 78 сылын бэлиэтээн бырааһынньыктааҕы Миитин ыытылынна.        Гражданскай уонна Аҕа Дойду сэриилэрин кыттыылааҕа М.И. Жирков пааматынньыгар венок ууруутуттан саҕаланна.

   Кыайыы күнэ – сибэтиэй бырааһынньык! Убаастабыл, кэриэстэбил бырааһынньыга!«Сэрии уонна Тыыл» ветераннарыгар аналлаах пааматынньыкка сэрии сылын оҕолоро, нэһилиэк олохтоохторо, икки оскуола үөрэнээччилэрэ түмүстүлэр. Ол курдук, сэрии толоонугар охтубут, өстөөҕү үлэнэн үлтүрүппүт, кыайыы көтөллөөх кэлэн эйэлээх олоҕу уһансыбыт сэрии, тыыл, үлэ ветераннарыгар анаммыт пааматынньыкка, биир дойдулаахтарбытыгар сүгүрүйэн, сибэкки дьөрбөтө уурулунна.

   Миитиҥҥэ Нам улууһун баһылыга Слепцов Юрий Иннокентьевич, Хамаҕатта баһылыга Ушницкай Евгений Сергеевич, улуус баһылыгын социальнай боппуруостарга солбуйааччы Абрамов Петр Васильевич, Нам улууһун байыаннай комиссарын эбээһинэһин толорооччу Дьяконова Елена Михайловна  кыттыыны ыллылар.

Мустубут нэһилиэк олохтоохторун улуус баһылыга уонна нэһилиэк баһылыга эҕэрдэлээтилэр.

   Быйылгы Улуу Кыайыы 78 сылын көрсөллөр – тыыл ветераннара Захарова Анастасия Ивановна, Феофанов Егор Михайлович, блокада кыттыылаҕа Ушницкая Эльви Давыдовна,  политическай сиэртибэ оҕото Васильева Александра Николаевна, сэрии тулаайаҕа Охлопкова Евдокия Христофоровна уонна 31 сэрии сылын оҕолоро.

   Аан дойдуга бүгүҥҥү буола турар быһыыга-майгыга, анал байыаннай дьайыыга Хамаҕаттаттан 11 киһи кыттыыны ыла барбыттара. Олортон биирдэстэрэ үс оҕотунан төннөн кэлбитэ.

    Бу дьылолунньу уонна кулун тутар ыйдарга хамаҕатталар хомолтолоох сураҕы истэммит, бары олус аймаммыппыт, курутуйбуппут.Биһиги нэһилиэктэн туруу үлэһит, чаҕылхай уолаттарбыт Замятин Ярослав Иннокентьевич, Захаров Алексей Николаевич  кэскиллээх олоҕу түстэһэн, Аҕа дойдуларыгар Ытык иэстэрин толоро сылдьан сэрии толоонугар олохторун толук уурдулар, Дьоруойдуу оҕуннулар. Кинилэр дьоруойдуу быһыыларын бэлиэтээн «Хорсунун иһин» уордьанынан наҕараадаланнылар.

   Бу күн  «Хорсунун иһин» уордьаны Захаров Алексей Николаевичка (посмертно) улуус баһылыга Юрий Иннокентьевич аҕатыгар Николай Дмитриевич Захаровка туттарда.

  Миитин Василий Васильевич Ушницкай – Сэки «Биллибэт саллаат саҥата» хоһоонун строкаларынан, дойдуга буола турар балаһыанньаҕа хаһааҥҥытааҕар да сомоҕолоһон, биир санааланан сырыттахпытына ыарахаттары кыайыахпыт, моһоллору туоруохпут диэн этиинэн түмүктэннэ.

   Салгыы миитин кыттыылаахтарынолохтоох дьаһалта уонна «Тускул» оҕо уһуйаанын коллективтара «Полевой хааһынан» күндүлээтилэр. Онтон «Түһүлгэ» норуот айымньытын киинигэр махталлаах көлүөнэ аатыттан Хамаҕатта Саха-француз лиссиэйин үөрэнээччилэрэ «Сомоҕолоһуу түһүлгэтэ» бырааһынньыктааҕы концерт көрдөрдүлэр. Ону тэҥэ, олохтоох библиотека дьиэтигэр «Тупсууна»дьахтар сэбиэтэ тэрийиитинэн, «Моя семейная реликвия» диэн ааттаах Аҕа Дойду сэриитин сылларын, ол кэминээҕи олоҕу кэпсиир быыстапка-инсталляция  туруорулунна. Дмитрий Новгородов аатынан «Кэскил» балаҕаҥҥа нэһилиэк ветераннарын сэбиэтэ «Күөх уот» бырааһынньыктааҕы остуолун тэрийдэ.

Тыыл ветераннарыгар, сэрии сылын оҕолоругар нэһилиэк тэрилтэлэрэ ас наборун оҥорон бэлэх ууннулар.