Алтынньы ый 4 күнүгэр, көмүс күһүн биир кэрэ-бэлиэ кэмигэр  Д.Д. Новгородов аатынан  «Кэскил» саха балаҕаныгар Аан дойду үрдүнэн бэлиэтэнэр Аҕам саастаахтар күннэрин  бырааһынньыктааҕы тэрээһинэ буолан ааста.

Тэрээһин саҕаланыыта саха балаҕанын хаһаайката Ольга Ивановна Новгородова буоларын курдук көмүлүөх оһоҕор уот оттон алгыстаах алаадьынан айах тутта.

Алгыһынан арыллыбыт «Күһүн-дьоллоох түгэн» диэн аҕам саастаах дьоммутугар анаммыт сынньалаҥ көрсүһүүгэ бэтэрээннэрбит, үөлээннээхтэрин кытта көрсүһэн, итии чэйдээх, толору астаах остуол тула олорон ирэ-хоро кэпсэтэн, дуоһуйа сынньаннылар, сэргэхсийдилэр.

Нэһилиэкпит ытык саастаахтарын, бэтэрээннэрин «Хамаҕатта нэһилиэгэ» муниципальнай тэриллии дьаһалтатын баһылыгын солбуйааччыта  Москвитин Владилен Николаевич эҕэрдэлээтэ.   

Ытык – мааны дьоммутун ылбаҕай ырыаларынан, хомоҕой хоһооннорунан  оскуола саастаах оҕолор «Чаҕыл» бөлөх салайааччы Т.М. Гаврильева, Хамаҕата саха француз лиссиэйин  үөрэнээччилэрэ  салайааччы Н.Г.Булдакова оҕолоро истиҥник эҕэрдэлээтилэр.

Илья Васильевич Новиков байааныгар доҕуһуоллатан уруккулуу ырыа ыллаатылар, үҥкүүнү өрө туттулар.

«Барахсааана» биир көлүөнэ саастаах дьүөгэлэр түмсүүлэрэ күһүҥҥү фотозона тэрийбиттэрэ. Бырааһынньык кыттыылаахтара үтүө күнтэн өйдөбүнньүк хаалларан хаартыскаҕа түһэн астынан бардылар.  

Нэһилиэк бэтэрээнин сүбэтэ күһүн тематыгар күрэхтэри биллэрбитэ. Айылҕа матырыйаалыттан панно «Мин күһүнүм» көрүүгэ 1 миэстэ  — Сивцева А.А., 2 миэстэ — Гоголева А.И., 3 миэстэ — Жиркова Е.Н. ыллылар. Саамай дьикти көстүүлээх оҕуруот аһыгар 1 миэстэ – Новгородова О.И.,  2 миэстэ — Гоголева А.И., 3 миэстэ — Жиркова Е.Н. «Айылҕа кэрэ көстүүтэ»  хаартыскаҕа күһүҥҥү айылҕа 1 миэстэ Новгородова О.И. бириистээх  миэстэлэри ыллылар.

Күн – дьыл ааһара түргэнин, бириэмэ кынаттаах кэриэтэ көтөр, көмүс күһүн күннэрэ кэлбитин билбэккэ да хаалабыт. Олоҕу көрбүт, муударай, ытыктанар, убаастанар ытык саастаах дьоммут, халлаан эһиги үрдүгүтүгэр куруук эйэлээх буоллун, күн дьэҥкэтик көстүөхтүн, дьоллоох доруобай олоҕу баҕарабыт!