Сааһын санаа кэрэҕэ талаһар,

Сааһын истиҥ иһирэх кэлэн

Сааскыттан тутула суох сайар.

Сааскылыы сайа тиийэн кэллэ тиллии, үүнүү, ситии.  Дьахтар — Ханнык да кэмҥэ, ханнык да үйэҕэ кэскил кэмин кэрэһитэ буолан, тускуну оҥорсор — тобуллаҕас өйдөөх, саҥаны өйүүр — сайдам айылгылаах, сатабыллаах дьаһаллаах — Саха Далбар Хотуна дьулуурунан да, тулуурунан да, ситиһиилээх үлэтинэн да холобур буолар.

Муус устар 22 күнүгэр «Түһүлгэ» норуот айымньытын киинигэр   «Сөрүө», «Айыы Хотун»  түмсүүлэр «Кэрэни кэрэһэлиир, үтүөнү түстүүр — Далбар Хотуттар» 5 сыллаах үбүлүөйдээх киэһэлэрэ сонун көстүүлээхтик ыытылынна. Бу икки түмсүү тэрээһинин төрдүгэр турбут Мария Николаевна Аманатова буолар.  

«Сөрүө» түмсүү күн сырдык утахтарынан айбыт-туппут айымньылара, саха эрэ куттааҕы абылыыллар, харах хайгыы көрөр мандара буолаллар. Өбүгэбит төрүт дьарыгын, кыл-сиэл тигиитин илдьэ сылдьар «Сөрүө» түмсүүгэ эдэрдиин, аҕам саастаах дьон бары бииргэ, үтүө сүбэнэн Мария Николаевнаҕа сылдьаллар.

Кэнсиэр саҕаланыыта кинилэринэн арылынна. «Үс кут сиэригэр» оҥоһуллубут олбохтор (Салгын кут, ийэ кут, буор кут), суҥ сорүө. Саха АССР төрүттэммитэ 100 сылын көрсө убаһа хабаҕынан паннону Василий Сивцев хоһоон ааҕар уолаттара тутан киллэрбиттэрэ. Итиэннэ олоҥхоҕо кэпсэниллэр ытык халлаан аттара сырсыыларыттан кимиэллээх туйахтаах «Суордаайы Хара аты»  толору симэҕин таҕыннарбыттара дьон кэрэхсэбилин ылла. Бу курдук бииртэн биир оҥоһук сыанаттан түһэн саалаҕа көстө ууруллан туспа композиция буолан тахсыбыта, тэрээһини толорон биэрдэ. 

Бу түмсүүлэргэ араас идэлээх, түбүктээх үлэлээх ыал ийэлэрэ, эбээлэрэ сылдьаллар. Кинилэри  ситимниир биир уопсай дьарык — саха төрүт үгэһинэн кыл сиэлинэн ииск-күүс, үҥкүү кэрэ абылаҥа. «Сөрүө түмсүү» уонна «Айыы Хотун» коллектива 5 сыллаах «Кэрэни кэрэһэлиир, үтүөнү түстүүр — Далбар Хотуттар» истиҥ киэһэлэрэ сонуннук көһүннэ   Ити курдук алгыска тардыһан, үтүөҕэ дьулуһан амарах санаалаах сахам далбардара тулаларын тупсара, кэрэни кэрэһэлии, үтүөнүү түстүү сылдьаллар.