«Кэскил. Таптал. Ис-кэрэ. Ил-Эйэ»-2 тэрээһин Саха сирин Ийэлэрин күнүгэр ананна

    Хамаҕатта нэһилиэгэр, алтынньы 14 күнүгэр, “Туһулгэ» норуот айымньытын киинигэр,  «Кэскил. Таптал. Ис-кэрэ. Ил-Эйэ» диэн истиҥ тэрээһин Саха сирин Ийэлэрин күнүн көрсө, Хамаҕаттабыт нэһилиэгин ийэлэрин түмэр, кэрэхсиир сыаллаах  иккис төгүлүн тэрилиннэ. Бары ийэлэри нэһилиэк баһылыгын солбуйааччыта Москвитин Владилен Николаевич эҕэрдэлээтэ, “Бастыҥ тиэргэн” күрэх кыайыылаахтарын наҕараадалаата.

Бу күн, олоххо,  үлэҕэ актыыбынай позициялаах Ийэлэр,  Валентина Иванова – эдэр ийэ, уус-уран самодеятельность ырыаһыта, “Тускул” детсад үлэһитэ, Саргылана Иванова – саха боронсуус лиссиэй-интернат иитээччитэ, “Сайдам” түөлбэттэн, Екатерина Быканова — уус-уран самодеятельность актыбыыһа “Арыы-Тиит” түөлбэттэн, Саргылана Индеева —  нэһилиэк дьахталларын сэбиэтин бэрэссэдээтэлэ “Үрдэл” түөлбэттэн, Саргылана Назарова – Саха бороонсуус лиссиэй учуутала биэс түһүмэххэ кыттан бары олус үчүгэй бэлэмнээхтэрин көрдөрдүлэр.

          “Көрүҥ. Билсиҥ. Сэҥээриҥ” түһүмэххэ бэйэлэрин билиһиннэрдилэр,“Сир — дойду кэрэтэ – Хамаҕатта!”  түһүмэххэ төрөөбүт, олохсуйбут Хамаҕатталарын  туһунан эссе суруйбуттарын ааҕан иһитиннэрдилэр.“Билсиҥ, мин ыалдьытым”  түһүмэххэ улууска, нэһилиэккэ биллэр талааннаах дьону, оҕолору ыҥыран ыалдьыт буолан кытыннарбыттара болҕомтону тарта, ыалдьыттаатылар: Хамаҕатта орто оскуолатын үөрэнээччилэрэ Нарыйана Ратникова дьүөгэтинээн Сайаана Павловалыын, Хамаҕатта нэһилиэгин ыллыыр дьиэ кэргэнэ Людмила, Степан Ивановтар, талааннаах ыччаппыт Николай Жирков, Саха боронсуус лиссиэйин үөрэнээччилэрэ Айыллаана Павлова дьүөгэтинээн Дайаана Румянцевалыын уонна элбэх ырыа ааптара, мелодист Михаил Макаров. “Талаан уонна дьоҕур” түһүмэххэ талааннарын, сатабылларын көрдөрдүлэр “Кэм. Муода. Стиль” түһүмэххэ ийэлэрбит араас кэмнэр модаларынан таҥнан, симэнэн кэрэ көстүүнү бэлэхтээтилэр. Истин тэрээһини  ийэҕэ аналлаах ырыаларынан Олеся Лукачевская, Вадим Афанасьев, Миша Петров уонна “Күлүмчээнэ” оҕо ансаамбыла киэргэттилэр.       

          Ыҥырыыбытын ылынан кэлбит нэһилиэкпит бастыҥ общественник ийэлэрэ Заровняева А.З.- «Барахсаана” эбээлэр түмсүүлэрин салайааччыта, Андреева С.Д.- “Хардыы” түөлбэ салайааччыта уонна “Туһулгэ» норуот айымньытын киинин директора Харитонова А.А. сыаналаатылар.

       Бары да бииртэн-биир талбыт курдук талааннаах, дьоҕурдаах бырааһынньыктааҕы тэрээһин  үөрүүтүн тэҥҥэ үллэстибит, этиибитин быһа гыммакка бэлэмнээх кэлбит кыргыттарбытыгар, ийэлэрбитигэр анал ааттар ананнылар, үлэлиир тэрилтэлэрин профкомнарыттан, олорор түөлбэлэриттэн, “Туһулгэ» норуот айымньытын киинин аатыттан сэмэй бэлэхтэр туттарылыннылар.

          «Уран Ийэ»  ааты Иванова Саргылана Климентьевна ылла, «Сайдам Ийэ» Индеева Саргылана Руслановна, «Талба Ийэ» Быканова Екатерина Николаевна,  «Истиҥ Ийэ» Назарова Саргылана Петровна, «Кэрэ Ийэ» Иванова Валентина Александровна буоллулар. Тэрээһинтэн ийэлэр олус астыммыттарын биллэрдилэр. «Маннык сылын ахсын өссө салгыы тэрийэ туруҥ«, — диэн баҕа санааларын эттилэр.