Алтынньы 4 күнүгэр Саха сирин 40 нэһилиэктэригэр киинэ саалалара биир тэҥинэн аһылыннылар, ол иһигэр Хамаҕатта нэһилиэгэр, «Түһүлгэ» норуот айымньытын дьиэтигэр үлэлээтэ. Бу киинэ саалата култуура дьиэлэригэр киинэни көрдөрөр судургу систиэмэлээх бырайыак, нэһилиэктэргэ киинэни көрөр кыаҕы биэрэргэ туһуламмыт «Экстра Синема» диэн өрөспүүбүлүкэтээҕи ситим бырайыагынан аһылынна. Киинэ саалатын үөрүүлээх аһыллыыта аныгы үйэ сиэринэн видеоконференция сибээһинэн ыытылынна. Быһа сибээскэ   Россия Президенин дьаһалтатын салайааччытын солбуйааччы М.С. Орешкин, СӨ  Ил Дархана А.С. Николаев, Россия Президенин анал бэрэстэбиитэлигэр цифровой уонна технологическай сайдыы боппуруостарыгар АНО “Платформа НТИ” генеральнай дириэктэрэ Д.Н. Песков, «Экстра синема» генеральнай директора П.А. Чиряев, “Кыталыктаах кырдалым” уус-уран киинэ режиссера М.Г.Лукачевскай  кыттыыны ыллылар.

          «Түһүлгэ» норуот айымньытын дьиэтин киинэ саалатын  “лыык” курдук тобус толорутук толорбут  көрөөччүлэрин, олохтоохторун, оҕолору “Хамаҕатта нэһилиэгэ” МТ баһылыга Е.С. Ушницкай эҕэрдэлээтэ. Киинэ саалата арыллыытын кэмигэр нэһилиэккэ араас кэмнэргэ киномеханигынан үлэлээбит дьоннорбутун ахтан-санаан аастыбыт. Кинилэр ортолоругар Николай Григорьевич Дьяконов, Захар Данилович Гуляев, Алексей Ефремович Винокуров, Тихон Александрович Сысолятин, Николай Елисеевич Гуляев, Григорий Герасимович Дорофеев, Макар Николаевич Жирков, Петр Семенович Куличкин, Евтропий Спиридонович Охлопков, Федор Павлович Охлопков,Василий Григорьевич Больницкай, Вячеслав Капитонович Лукин  ааттара ааттанна.

          Бастакы көрөөччүлэр аһыллыы күнүгэр, Иван Дьячковскай-Кыталык Уйбаан “Кустугу ситтэрбин” сэһэнигэр олоҕуран “Кыталыктаах кырдалым” («Там, где танцуют стерхи»),  сахалыы киинэни босхо көрдүлэр.

          Киинэ кэннэ уус-уран самодеятельность актыбыыһа, уус-уран оҥоһуктар маастардара Мария Аманатова: ”Дьэ күүтүүлээх, кэтэһиилээх саҥа сүүрээммит, нэһилиэкпитигэр киинэ саала олоххо киирбитинэн эҕэрдэлиибин, наһаа астына киинэбитин көрдүбүт, мин иккистээн көрдүм эрээри син биир “харах уулаах” саҥалыы көрөр курдук киинэни көрдүм. Дьэ мантан ыла киинэ көрөн абыранабыт» диэн үөрүүтүн үллэстибитигэр, биһиги кэллэктиип астына иһиттибит. Киинэ саалата мантан ыла сахалыы, нууччалыы киинэлэри «Экстра синема» ыытар анал каталогынан дуогабар быһыытынан көрдөрүөҕэ.

         Онон, тыа сирин дьоно, куорат сириттэн туох да итэҕэһэ суох, саҥа тахсар киинэлэри улахан экраҥҥа көрөр кыахтанныбыт, олорор олохпут, үлэлиир үлэбит сайдыыта биир харыс үрдээтэ диэн үөрэ бэлиэтиибит.