80 сыл анараа өттүгэр Советскай норуот, кини Албан ааттаах Кыһыл Армията, фашисткай Германияны бүтэһиктээхтик үлтүрүппүтэ Рейхстах үрдүгэр Ийэ дойдубут кыһыл былааҕын күөрэччи тутан Кыайыыны аҕалбыттара!

Ол курдук, олунньу 7 күнүгэр, 16 чаас 55 мүнүүтэҕэ Кыайыы Знамята Нам улууһун 2 Хомустаах нэһилиэгиттэн, Хамаҕатта нэһилиэгэр кэлэр үөрүүлэх түгэнэ буолан ааста.  Бу историческай суолталаах эстафетаны нэһилиэкпитигэр көрсүүгэ Нам улууһун байыаннай комиссара Васильев В.В., Нам улууһун баһылыгын социальнай боппуруостарыгар солбуйааччы Протопопов Е.А., Нам улууһун дьиэ кэргэни, ыччаты кытары үлэлиир салааларын салайааччыта Евстафьева Е.С. кытыннылар. Знамяны Е.М.Шапошников аатынан орто оскуола 11 кылааһын үөрэнээччитэ Коля Иванов чиэстээхтик тутан киирдэ. 

     «Кыайыы Знамята» өрөспүүбүлүкэтээҕи эстафетатын «Хамаҕатта нэһилиэгэ” МТ баһылыга Ушницкай Е.С., Хамаҕатта нэһилэгин Ытык сүбэтин бэрэссэдээтэлэ Захаров Н.Д., Е.М.Шапошников аатынан орто оскуола 11 кылааһын үөрэнээччитэ Толя Мокрощупов сыанаҕа тахсан көрүстүлэр. Кыайыы Знамятын баһылыктар хардарыта туттарыстылар.

     Нам улууһун баһылыгын солбуйааччы Протопопов Е.А., долгуйан туран үөрүүлээх быһыыга-майгыга Хамаҕатта нэһилиэгин баһылыгар Ушницкай Е.С., знамяны туттарда.

     Элбэх үтүө тыл этилиннэ, тыл эппиттэр ортолоругар Хамаҕатта баһылыга Евгений Сергеевич Ленинград блокадатын кыттыылааҕа Эльви Давыдовна эбээлэҕинэн диэн тутунна, Николай Дмитриевич  оччолорго кыра саастааҕын, сэрии кэмин ыар сылларын хайдах өйдүүрүн ахтан-санаан ааста, эһэлэрбит, эбэлэрбит хорсун олохторо, сүҥкэн оруоллаах холобур буоларын кэнчээри ыччаппытыгар бэлиэтээн эттэ. В.П. Артамонов аатынан Саха француз лицейын 4 кылааһын үөрэнээччилэрэ ( кыл.сал. Поротова Е.М) “Өйдүүбүт! Киэн туттабыт! Махтанабыт!” хоһоонунан кыттыыны ыллылар.  Үөрүүлээх түгэн    Аҕа дойду улуу сэриитин кыттыылаахтарыгар уонна тыыл ветераннарыгар аналлаах мемориальнай комплекс- пааматынньыгар сибэкки дьөрбөтүн ууруутунан, уопсай хаартыскаҕа түһүүнэн түмүктэннэ.

     2025 сыл Арассыыйаҕа Аҕа дойдуну, Саха сиригэр Ийэ дойдуну көмүскээччилэр, Нам улууһугар  Кыайыы, Хамаҕатта нэһилиэгэр Патриотизм сылынан  биллэриллэн, араас хабааннаах аахсыйалар, тэрээһиннэр, үлэлэр биир ситимнээхтик ыытыллыыларыгар Хамаҕатта нэһилиэгэ бэлэмнээҕин көрдөрөн, Кыайыы 80 сылыгар анаммыт суолталаах бэлиэ түгэн биир сыалын соругун өрө көтөҕүллэн толордо.

Татьяна Гаврильева