Бүгүн «Түһүлгэ» норуот айымньытын киинигэр  Аан Дойдутааҕы Оҕо көмүскэлин күнүгэр анаммыт алын сүһүөх кылаас оҕолоругар сахалыы остуол  оонньууларыгар турнир ыытылынна. Уопсайа 15 оҕо кыттыыны ылла.  

Имигэс илии, сымса тарбах остуол оонньуутун көҕүлүттэн тутан оҕо аймах үөрдэ-көттө, мэтээллэринэн, дипломнарынан, минньигэс бириистэринэн наҕараадаланан сүрдэрэ көтөҕүлүннэ.  Инникитин  даҕаны нэһилиэкпит оҕолоро сахалыы остуол оонньууларын сэргээн, сэҥээрэн олохтоохтук ылсан дьарыктаныахтара. Бу тэрээһин үгэскэ кубулуйан сылын аайы ыытыллыа диэн бүгүҥҥү турнир сүрүннүүр  судьуйата Нам улууһун сахалыы остуол оонньууларын федерациятын салайааччыта Маргарита Евтропьевна Охлопкова санаатын үллэһиннэ.

       Судейскай коллегияҕа кыттыыны ыллылар төрүт  остуол оонньууларын улуус сборнайын кыттыылаахтара, спортсменнара нэһилиэк бэтэрээн оонньооччута Кривошапкина Глория Аполлинариевна, Новгородова Надежда Николаевна, оҕолор Белолюбская Лилия уонна Охлопков Данил.

      «Күннүүн сырсар оҕо саас» Е.М. Шапошников аатынан Хамаҕатта орто оскуолатын алын сүһүөх кылааһын үөрэнээччилэрэ ыллам ырыа, үҥкүү, тыыннаах музыка, театральнай инсценировкалаах олус сэргэх кэнсиэри көрдөрдүлэр. Оторой-моторой оҕолорбутун иитэр-үөрэтэр, сайыннарар учууталларбытын Педагог уонна Наставник сылынан түгэнинэн  эҕэрдэлиибит, айымньылаах  үлэҕит таһаарыылаах, үтүө түмүктээх буоллун.

Хамаҕаттатааҕы оҕо сайдар киинин «Тускул» уһуйаанын бэлэмнэнии бөлөх оҕолорун «Мин таптыыр уһуйааным» быыстапката турда. Салайааччы эбии үөрэхтээһин педагога Бурнашева Елена Александровна уонна З. П. Винокуров аатынан Намнааҕы Оҕо искусствотын оскуолатын Хамаҕаттатааҕы филиалын уруһуй кылааһын үөрэнээччилэрин “Будущее моего села” – диэн уруһуй конкурсугар кыттыбыт оҕолор үлэлэрэ турдулар, преподаватель Дмитриев Рустам Петрович.

Сылын ахсын, оҕо бырааһынньыгын киэргэтэн, ситэрэн биэрэр «Симба» оҕо оонньуурдарын маҕаһыына сүүйтэриитэ суох лотерея тэрийэригэр Сайаана Николаевна Нератоваҕа махталбытын тиэрдэбит.