Хамаҕатта ыччаттарыгар бэлэх
Хамаҕатта нэһилиэгэр үөрүүлээх күн буолла. «Ыччат ыллыга» тутуллан үлэҕэ киирдэ. Бу үлэни урбаанньыт биир дойдулаахпыт, кылаабынай подрядчик Кривогорницын Семен Юрьевич, “Лигран” ХЭТ генеральнай директора Кобяков Григорий Андреевич, генеральнай директоры солбуйааччы Бурнашев Михаил Афанасьевич оҥорон үлэҕэ киллэрдилэр. Ыччат аллеятын тутааччылара, бэйэбит уолаттарбыт: Новгородов Дмитрий, Аммосов Савва, Нестеров Василий, Захаров Александр, Никифоров Василий, Сагыняхов Николай, Индеев Иван, Зоиров Рустам, Сивцев Евгений күнү-дьылы аахсыбакка тутууну күүстээхтик ыытан Хамаҕатта ыччаттарыгар бэлэх ууннулар. Бырааһынньыктааҕы тэрээһиҥҥэ оҕо-аймах, ыччат, олохтоохтор тоҕуоруһа муһуннулар, сахалыы сону толору тиктибит нэһилиэк актыбыыс далбар хотуттара, бары олохтоохтору, кэлбит ыалдьыттары алаадьынан күндүлээн көрүстүлэр. Бочуоттаах ыалдьыттарынан: “Нам улууһа» Муниципальнай оройуон Баһылыга- Слепцов Юрий Иннокентьевич», СӨ кылаабынай архитектора — Папок Любовь Александровна, «Ыччат ыллыга» тутуу кылаабынай подрядчига Криговорницын Семен Юрьевич, СӨ территориятын сайыннарыыга компетенциялар Кииннэрин директора — Маркина Ирина Афанасьевна, «Снега» архитектура бюротун толорооччу дириэктэрэ -Степанова Анна-Мария Владимировна, «Нам улууһа» Муниципальнай оройуон спортка управлениетын начальнига, улуус депутата — Иванов Павел Гаврильевич буоллулар.
Үөрүүлээх быһыыга-майгыга тэрээһин символическай лиэнтэтин Хамаҕатта нэһилиэгин баһылыга Евгений Сергеевич Ушницкай, “Нам улууһа» Муниципальнай оройуон Баһылыга- Слепцов Юрий Иннокентьевич», СӨ кылаабынай архитектора — Папок Любовь Александровна уонна Хамаҕатта ыччаттарын аатыттан Е.М.Шапошников аатынан орто оскуола учуутала Гоголева Айыына Максимовна бэлиэни кырыйдылар. Ыччат ыллыгын тутуута саҕаланан үлэтэ түмүктэммит бэлиэ күнүн улууспут талааннаах ыччата Намнааҕы П.П. Ядрихинскай –Бэдьээлэ аатынан Олоҥхо дьиэтин специалиһа, алгысчыт Владимир Сыромятников сахалыы сиэринэн ситэрдэ. Хамаҕатталарга бүгүн олус суолталаах күн үүммүтүнэн «Нэһилиэккэ табыгастаах эйгэни үөскэтии” федеральнай программанан тутуллубут ыччат аллеята тутуллан үлэҕэ киирбитинэн салайааччы дьоммут эҕэрдэлэрин тиэртилэр, ыччакка, оҕо-аймахха харыстабыллаахтык сыһыаннаһалларыгар, тутуу тула үүнээйилэри, мастары үүннэрэн кылааттарын киллэрсэллэригэр баҕа санааларын эттилэр. Эҕэрдэлэр кэнниттэн Хамаҕатта ыччаттара –Е.М.Шапошников аатынан орто оскуола үөрэнээччилэрэ “Доҕордоһуу”, В.П.Артамонов аатынан саха боронсуус лиссиэй “Биир ситим” оҕо ыччат түмсүүтэ “Дьөһөгөй” флешмоб үҥкүүтүн астына үҥкүүлээн тэрээһини хас да бүк киэргэттилэр. Ырыаһыт оҕолорбут Василина Корчанова, Алина Дьяконова, уус-уран самодеятельность ырыаһыттарын Валентина Ушницкая, Александр Захаров ыллам ырыалара ыраахха диэри дуорайда. „Бу күн барыта сатанна, олохпут кэрэнэн күлүмүрдээтэ, санаабыт үрдээтэ” диэн бары ыччаттар, олохтоохтор үөрүүнү тэҥҥэ үллэһиннилэр. Бу курдук, нэһилиэкпит үлэтэ-хамнаһа сайдан ситиһииттэн ситиһиигэ дабайан истин, тутуллубут эбийиэктэринэн тубустун!

Татьяна Гаврильева
«Түһүлгэ” норуот айымньытын киинэ