Өрөспүүбүлүкэбит бары оскуолаларыгар тиһэх чуорааннар чугдаардылар. » Түһүлгэ» норуот айымньытын киинигэр бүгүн, Хамаҕатта нэһилиэгин оскуолаларын 34 выпускниктарыгар: Е.М. аатынан орто оскуола 11 кылаастара 12 оҕо, кылаас салайааччыта Павлова А.И., В.П.Артамонов аатынан саха боронсуус лиссиэй 11″а» кылаас 10 оҕо, кылаас салайааччыта Новгородова О.Д., 11″б» кылаас 12 оҕо, кылаас салайааччыта Слепцов А.П. оскуоланы бүтэрэр долгутуулаах бырааһынньыктара тэрилиннэ. Тэрээһин үөрүүлээх чааһа Хамаҕатта нэһилиэгин Өрөгөйүн ырыатынан саҕаланна. Фанфар доҕуһуолунан выпускниктар кыһыл көбүөрүнэн долгуйа-үөрэ үрдүк сыанаҕа таҕыстылар, оҕо саас бүтүүтүн, улахан олох саҕаланыытын бэлиэтин көрдөрөр выпускниктар вальстарын астына үҥкүүлээтилэр. Олохтоох дьаһалта аатыттан Хамаҕатта нэһилиэгин ыччаты кытта үлэҕэ испэсэлииһэ Максим Заболоцкай бырааһынньыгынан эҕэрдэтин тириэртэ, кылаас салайааччыларыгар сэмэй бэлэхтээх эҕэрдэ суруктары туттартаата. Нэһилиэкпит оскуолаларын выпускниктарын олох киэҥ аартыгар үктэнэр бэлиэ түгэннэригэр: «Эрчим» спорт дьиэтэ, » Тускул» уһуйаан профкома, врачебнай амбулатория, «Түһүлгэ» норуот айымньытын дьиэтэ, түөлбэлэр «Арыы-Тиит», «Кытыл», «Сайдам», «Үрдэл», оҕо спортивнай оскуолата «Олимпик» выпускниктар чугас дьонноро-аймахтара, төрөөбүт үөскээбит дойдуларыттан Намтан — » Ленскэй нэһилиэк» дьаһалтата, 1 Хомустаахтан «Чагда», Партизантан»Эрэл», » Муоҕан» түөлбэлэр, выпускниктар үөрэҕи таһынан, нэһилиэк олоҕор кыттыбыттара туһалаах буолуоҕун этэн туран  бэлэхтэри туттардылар. Эҕэрдэлэр кэннэ Аан дойдуга, Өрөспүүбүлүкэҕэ киэҥник биллэр биир дойдулаахпыт педагог, салайааччы Матрена Евсеева -Мотокуо салайар «Айар Кут Hollywood” оҕо-ыччат бөлөҕө оҕолору сайыннарар, көҕүлүүр соруктаах, киэҥ ис хоһоонноох программанан ыалдьыттаата, оҕолорго, выпускниктарга умнуллубат түгэни бэлэх уунна… Үөрүүлээх тэрээһин «Хамаҕатта нэһилиэгэ» тыа сирин түөлбэтин, общественноһын, «Түһүлгэ» норуот айымньытын киинин көҕүлээһининэн бастакытын ыытылынна, аны да маннык кэрэ түгэннэр үгэскэ кубулуйан ыытыллыылара  — үтүө өйдөбүлгэ сылдьар, кэлэр көлүөнэни иитиигэ туһуланар биир » Бастыҥ бырайыак» эбит диэн санааҕа кэллэ! 

Татьяна Гаврильева

Ыам ыйын 26 күнэ 2026 сыл

Хамаҕатта нэһилиэгэ