Биир саамай сырдык, ыраас бырааһынньык Оҕо көмүскэлин күнэ.

“Түһүлгэ» норуот айымньытын  киинэ,  нэһилиэкпит оскуолаларын алын сүһүөх кылаастарын кыргыттарыгар  “Чэмэлиинэ-2026»  мааны эйгэлээх күрэҕи  тэрийдэ. . Бу күрэх оҕо үтүө туруктаах буолуутугар, кыыс оҕо кэрэҕэ дьулуһуутугар сыаллаах ыытылынна.  Кыргыттар бары 5 түһүмэххэ: бэйэни билиһиннэриигэ, араас норуот үгэһин сырдатыыга, талааны  көрдөрүүгэ, спортивнай  флеш-моб үҥкүүгэ,  мааны былааччыйалаах хаамыыга олус үчүгэй бэлэмнээхтэрин, кыһамньыларын көрдөрдүлэр. Дьүүлүүр сүбэҕэ улууска биллэр хореограф идэлээх, элбэх куонкурустар ааптардара, Намнааҕы Олоҥхо дьиэтин балетмейстера, СӨ култууратын туйгуна Татаринова Р.А – күрэх бэрэссэдээтэлинэн, Пухова А.И – «Хамаҕатта нэһилиэгэр кылаатын иһин” бэлиэлээх, нэһилиэк дьахтар сүбэтин чилиэнэ, Макарова Н.Г.-  СӨ култууратын туйгуна, “Түһүлгэ» норуот айымньытын  киинин испэсэлииһэ үлэлээтилэр. Түмүккэ, “Чэмэлиинэ –2026»   кыайыылааҕынан Уйгулана Барашкова — В.П. Артамонов аатынан саха боронсуус лиссиэй 4 кылааһын үөрэнээччитэ  ааттанна, “Чэмэлиинэ -2026»  1-кы үрдэлин  София Протопопова — Е.М. Шапошников аатынан орто оскуола  3 кылааһын үөрэнээччитэ,  “Чэмэлиинэ-2026” 2-с үрдэлин  Сафина Зоирова —  Е.М. Шапошников аатынан орто оскуола  2  кылааһын үөрэнээччитэ , “Чэмэлиинэ-2026” 3-с үрдэлин   Кира Колесова  —  Е.М. Шапошников аатынан орто оскуола  3 кылааһын үөрэнээччитэ, « Мичийээнэ-2026” анал аат – Каталина Спиридонова — Е.М. Шапошников аатынан орто оскуола  1  кылааһын үөрэнээччитэ, “Нарыйаана -2026” анал аат Айыллаана Сивцева — Е.М. Шапошников аатынан орто оскуола  4 “а” кылааһын үөрэнээччитэ, “Талаана-2026” анал аат Аурелия Петрова — Е.М. Шапошников аатынан орто оскуола  4”б”  кылааһын үөрэнээччитэ “Сыдьаайа – 2026” анал аат – Милия Олесова — В.П. Артамонов аатынан саха боронсуус лиссиэй 1 кылааһын үөрэнээччитэ ыланнар кэрэчээн кыргыттарбыт көмүс буукубанан суруллубут лиэнтэ кэттилэр. Күрэхпит үрдүк таһымнаахтык ааһарыгар Кира Сивцева, Максим Сандулин хоһоонунан, Айтал Кобяков, Нарыйаана Никонова, Эрсан Кононов, Спартак Васильев, Дамир Сивцев, «Чаҕыл”оҕо ансаамбыла ырыанан киэргэттилэр. Кыттыбыт оҕолорго бырааһынньыгынан “Эгэлгэ» Назаров А.А., «Мозаика» Петрова Ж.П. маҕаһыыннар минньигэс мороженайынан күндүлээтилэр. Бу курдук, кэрэни түстүүр аналлаах сайыҥҥы күн күлүмүн курдук кэрэ бэлиэ күн сүргэбитин көтөхтө, сүрэхтэри  сылаанньытта. Бары кыттааччы кыргыттарбытыгар, төрөппүттэрбитигэр, көмөлөспүт учууталларбытыгар, күндү спонсордарбытыгар барҕа махталбытын тиэрдэбит!

                              Татьяна Гаврильева, бэс ыйын 1 күнэ 2026 сыл