Ыам ыйын 7 күнүгэр, Улуу Кыайыыны көрсө Хамаҕатта нэһилиэгин олохтоохторо, тэрилтэлэрэ, үөрэнээччилэрэ, иитииллээччилэрэ, общественноһа, нэһилиэк уулуссаларынан авторадиорубканан, кыайыы лозуннарынан, ырыаларынан «Өлбөт үйэлээх полк» колоннанан хаамсан нэһилиэк сарсыардаттан кыыһар кыһыл былаахтары күөрэччи тутан Улуу Кыайыы бырааһынньыгын уруйдаата. Кыайыыны уһансыбыт  аҕа көлүөнэ дьоммутун саныыр ытык иэспитин толорон, биир дойдулаахпыт, Кыһыл Аармыйа байыаһа М.И. Жирков, сэрии уонна тыыл бэтэрээннэригэр пааматынньыктарга өйдөбүнньүк гирлянда, сибэкки дьөрбөтө уурулунна. Нэһилиэк баһылыга Ушницкай Е.С., улуус мунньаҕын депутата Иванов П.Г., СӨ бочуоттаах бэтэрээнэ, сэрии сылын оҕото Захаров Н. Д. ол кэмнэри санаан аастылар, бэтэрээннэри, олохтоохтору эҕэрдэлээтилэр. Хамаҕатта орто оскуола 7 кылааһын үөрэнээччилэрин хора (сал. Заболоцкая Е.А.) эҕэрдэҕэ кыттыһан дорҕоонноохтук ыллаатылар. » Саллаат хааһыта» хонуу куухунатын » Тускул» оҕо уһуйаана тэрийдэ. Бу күн, «Дьоһун саас» Сандаара Оротоо салайааччылаах общественнай хамсааһын тэрийиитинэн » Сэбиэскэй кэм оонньуурдара» быыстапка, «Тохтоо, оҕо сааһым түгэнэ» хаартыскаларынан быыстапка үлэлээн дьоммут-сэргэбит сэҥээриитин ылыан ылла. Быыстапканы тэрийиигэ «Тупсууна» дьахтар түмсүүтэ олус көхтөөхтүк,турунан туран кытынна,  маны тэҥэ » Георгиевскай лиэнтэ» ааксыйаны тэрийбиттэрэ олус үөрүүлээх буолла. Аҕа көлүөнэҕэ, ытыктабылы, махталы биллэрэн бэтэрээннэргэ бырааһынньыктааҕы » Күөх уот» ыытылынна, Норуот уус-уран самодеятельноһын ырыаһыттара байаан доҕуһуоллаах эҕэрдэ ырыалары дьиэрэттилэр,  нэһилиэк хас биирдии тэрилтэлэрэ бэтэрээннэригэр бадараактары туттартаатылар. Үтүө күн тэрээһинигэр кыттыһан олохтоохтор, ыччаттар кыттыылаах » Өйдөбүнньүк чүмэчи» ааксыйата буолуоҕа, улууспут парадыгар күргүөмүнэн бүттүүн  сомоҕо колоннаҕа хаамсыахпыт. Бу курдук, Хамаҕатта нэһилиэгэ «Махталы биллээрии» тэрээһинигэр бииргэбит, түмсэбит!

Өйдүүбүт! Умнубаппыт! Киэн туттабыт!

Татьяна Гаврильева